Guido I
Proclamatie 2011-2012,
Prins Guido I (Guido Ernst)
Weej, Vôrs Iemus:
Zuvvende Vôrs ván 't Dreumelriêk; Ridder in de ordes ván D'n Dreumel, de Moelbaer en de Aendekoel; Grand voyageur du monde; Membri importante di frazione marmellata; Ambassadeur ván het greune graas án de witte hel, enz, enz,
hebbe de groëte iër um heer en nów, met of soonder ów goodvinge, d'n vieftigste Prîns ván 't Dreumelriêk te proklamere en te installere;
Ovverwaegende:
- Ten ierste: Dát D'n Dreumel d'r wer i geslaagd is um enne Prîns te vinge din, óndanks dees bárre tiejje, hiël zeker de gooje mood d'r i zal wiëte te halde;
- Ten twedde: Dát deze Prîns genne rówwe stiën is, már enne briljânt geslepe diamant, di hiël zeker en met gemaak drie daag zal schittere ovver ós Dreumelriek;
- Ten derde: Dát weej deze kiër en sportieve, muzikale en organisatorische doêzendpoët kriege deen ôk nag 's óp technisch gebied in 't verleeje behuurlijk án 't daak haet getummerd;
- Ten verde: Dát álle oplettende commissiehoëfde ván D'n Dreumel now wakker ziên gewaore en aal ánt bedaenke ziên hoe ze dit multitalaent dalik in eur commissie kunne ópneme;
- Ten viefde: Dát deze Prîns d'r totaal gen mójte mei zal hebbe um alle Dreumels en Dreumelinnekes mit de vastenaovend drie daag in de houdgreep te halde;
- Ten zesde: Dát ós neeje prinses tiedens de vastenaovend zal á-toëne dát hoempa en zumba hiël good same kunne gaon;
- Ten zuvvende: Dát ozze neeje Prîns ás gen ânder de magie ván de vâstenaovend verstiët en dát 't daorum zeker zoë zal ziên dát heej alle Dreumels en Dreumelinnekes ás 't ware zal begoochele mit zien vingervlugge vocabulaire;
- Ten achste: Dát deze neeje Prîns ovver en biëstige dosis humor beschikt, woarmej heej ás extra "Petje" beej de Two Petjes hiel zeker neet zuj misstaon;
- Ten niggende: Dát 't ván begeen âf á duudelijk zal zien dát deze Prîns d'r en halszaak ván giët make dát tiedens de vâstenaovens alliën muziek gedreijt giët waere ván eige bojjem;
- Ten tiende: Dát zoë-iets ok gewoën niks veurstelt ás ge óp muziekgebied zoveul ervaring het mit de vroege vastenaovesvierders;
- Ten elfde en leste: Dát het oêtkome van enne neeje Prîns en 't iën joar lang regere ovver het gânse Dreumelriêk dór deze neeje Prîns, Prinses en adjudánte hiël zeker ás en belangrieke en veurâl ernstige zaak zal waere gezeen;
Besloête weej:
Um heer en nou te gaon oétrope tot neeje Prîns, waobeej weej eum beneume tot:
Ridder in de Ordes ván d'n Dreumel, de Moelbaer en de Aendekoel, met de iëretitels:
Kroënprîns van d'n Humor; Cavallo Esperto di Piastre; Hiërser op de Platte Mat; Grand Nerd du Chapeau; Berschermhiër van de JoHo; en oétvinger ván de "orde ván de Kûnstemaeker" en rope nou oét tot vieftigste Prîns ván 't Dreumelriêk:
Prîns Guido d'n Iërste
mit zien Prinses Marly en Adjudante William en Frank
Gegaeve, Hôrs 28 Jannewari 2012
