Ted I

Vastenaovend 2025 2, 3 en 4 maart

Weej, Vôrs Naggus:

Achste Vôrs ván ’t Dreumelriêk;
 
Ridder in de ordes ván D’n Dreumel, de Moelbaer en de Aendekoel; Grande Mago con Mestolo; Tower of Power; Grand Donateur des Chansons, Ambassadeur van de Horsternachte, enz, enz,
 
hebbe de groëte iër um heer en nów, met of soonder ów goodvinge, d'n ver-en-vieftigste Prîns ván 't Dreumelriêk te proklamere en te installere;

 

Ovverwaegende:

 
  • Ten Iërste: Dát weej bliej ziên enne prîns gevónge te hebbe din al sinds vroege jeugd in gezelschap verkiërt ván inmiddels doorgeweenterde preenselijke collegas en weej d'r daorum ván ovvertuugd ziên dát heej al behuurlijk bekend is met 't klappe ván de zweep.
  • Ten Twedde: Dát weej enne hiele sportieve prîns kriêge di rent wie enne'n haas, serveert as de beste en zwemt ás enne vis, waordaor weej d'r dán ôk ván ovvertuugd ziên dât heej soonder miër in staot is um tiedes de vastelaovend de kop baove water te hâlde en hiël zeker neet köpke oonder zal gaon.
  • Ten Derde: Dát weej mit deze neeje prîns en organisatorisch paradepaertje binnen hale din mit zien besteurstalaent al óp hiël wát Horster veriëniginge zienne staempel haet moge drukke.
  • Ten Verde: Dát weej dit jaor, miër ás in veurgaonde jaore, en prinses kriêge die ál vroeg d'n draod haet ópgepakt en de leiding stevig in hânde haet genaome, wát beteikend dát zeej zich neet ván 't kaesje nao de moor lut steure en zich ál hiëlemaol neet óp de kâst lut jage.
  • Ten Viefde: Dát weej dit jaor te make kriêge mit enne prîns din mit volle teuge geniet vän älle Horster horeca actieviteite en pas óp hoês á-giet ás heej ás letste de deur ván de café âchter zich toe haet kunne trekke.
  • Ten Zesde: Dát 't daorum good is um te wiëte dát heej genog meugelijkhede haet um in de baas zien'en tiêd te relaxe, zoëlang heej már neet in slaop vult.
  • Ten Zuvvende: Dát 't már good is dát champions symbool staon vur 't Horster ondernemerschap, want ózze neeje prîns haet namelijk enne hiële speciale'n bând mit witte schummels.
  • Ten Achste: Dát weej d'r vánoêt moge gaon dát ozze neeje prîns mit vastenaovend drie daag lang óp volle snelheid en mit twië wiele door de bocht veuróp zal gaon in 't vastelaovesgebeure soonder oêt de bocht te vleege.
  • Ten Negende: Dát weej d'r gröts op ziên dát weej letterlijk enne'n echte knoêvelbaer kriege ás prîns di zich al zien gänse laeve i-spant vur de jonge Hôrstenaren, ván hiel jónk wies ál wát âlder.
  • Ten Tiende: Dát mit de komst ván deze neeje prîns d'r acuut en einde keumt án en 25 jaor alde traditie, wát vur de Ald Preense beteikend dát zeej op dit momaent zellef motte zeen te regele hoe ze án eur pilske kome.
  • Ten Elfde en leste: Dát 't óp zich gen aenkel probleem is dát ozze neeje prîns en bitje last haet ván seizoensgebónge bejaardheid , mar dát heej daor zelluf toch al hiël wát grieze haor en 'ne behuurlijke sik ván haet gekrege.

Besloête weej:

 
Um heer en nou te gaon oétrope tot neeje Prîns, waobeej weej eum beneume tot: Ridder in de Ordes ván d'n Dreumel, de Moelbaer en de Aendekoel,
 

Met de ieretitels:

Grande Capitano del Piroscafo; Hoëfdofficier ván Jong Nederland; Veurgenger ván Proemgas; Lord Furniture; Ambassadeur ván 't Roéje Kögelke wies 't Blauwe Stertje; en oétvinger ván de orde ván de "Kameräöj ván de Scheive Taoffel" en rope nou oét tot ver-en-vieftigste Prîns ván 't Dreumelriêk:
 
Prîns Ted d'n iërste
mit zien Prinses Marian en Adjudante Rob en Leon
 
Gegaeve, Hôrs 9 Jannewari 2016
Ted