Neejs

Weej, Vôrs Naggus:
Achste Vôrs ván ‘t Dreumelriêk;
Ridder in de ordes ván D’n Dreumel, de Moelbaer en de Aendekoel;
Grande Mago con Mestolo; Tower of Power;
Grand Donateur des Chansons, Ambassadeur ván de Horsternachte, enz, enz,
hebbe de groëte iër um heer en nów, met of soonder ów goodvinge,
d’n ver-en-vieftigste Prîns ván ‘t Dreumelriêk
te proklamere en te installere;

Ovverwaegende:

Ten Iërste: Dát weej bliej ziên enne prîns gevónge te hebbe din al sinds zien vroege jeugd in gezelschap verkiërt ván inmiddels doorgeweenterde preenselijke collegas en weej d’r daorum ván ovvertuugd ziên dát heej al behuurlijk bekend is met ‘t klappe ván de zweep.

Ten twedde: Dát weej enne hiële sportieve prîns kriêge di rent wie enne’n haas, serveert as de beste en zwemt ás enne vis, waordaor weej d’r dán ôk ván ovvertuugd ziên dát heej soonder miër in staot is um tiedes de vastelaovend de kop baove water te hâlde en hiël zeker neet köpke oonder zal gaon.

Ten Derde: Dát weej mit deze neeje prîns en organisatorisch paradepaerdje binnen hale din mit zien besteurstalaent al óp hiël wát Hôrster veriëniginge zienne staempel haet moge drukke.

Ten Verde: Dát weej dit jaor, miër ás in veurgaonde jaore, en Prinses kriêge die ál vroeg d’n draod haet ópgepakt en de leiding stevig in hânde haet genaome, wát beteikent dát zeej zich neet ván t kaestje nao de moor lut steure en zich ál hiëlemaol neet óp de kâst lut jage.

Ten Viefde: Dát weej dit jaor te make kriêge mi enne prîns din mit volle teuge geniet ván álle Horster Horeca activiteite en pas óp hoês á-giet ás heej ás letste de deur ván de café âchter zich toe haet kunne trekke.

Ten Zesde: Dát ’t daorum good is um te wiëte dát heej genog meugelijkhede haet um in de baas zien’en tiêd te relaxe, zoëlang heej már neet in slaop vult.

Ten Zuvvende: Dát ’t már good is dát champions symbool staon vur ’t Hôrster ondernemerschap, want ózze neeje prîns haet namelijk enne hiële speciale’n bând mit witte schummels.

Ten Achste: Dát weej d’r vánoêt moge gaon dát ozze neeje prîns mit de vastenaovend drie daag lang óp volle snelheid en mit twië wiele door de bocht veuróp zal gaon in ‘t vastelaovesgebeure soonder oêt de bócht te vleege. 

Ten Niggende: Dát weej d’r gröts op ziên dát weej letterlijk enne’n echte knoêvelbaer kriege ás prîns di zich al zien gânse laeve i-spant vur de jonge Hôrstenaren, ván hiel jónk wies ál wát âlder.

Ten Tiende: Dát mit de komst ván deze neeje prîns d’r acuut en einde keumt án en 25 jaor âlde traditie, wát vur de Ald Preense beteikent dát zeej op dit momaent zellef motte zeen te regele hoe ze án eur pilske kome.

Ten Ellefde en leste: Dát ’t óp zich gen aenkel probleem is dát ozze neeje prîns en bitje last haet ván seizoensgebónge bejaardheid, mar dát heej daor zelluf toch al hiël wát grieze haor en ‘ne behuurlijke sik ván haet gekrege.

Besloête weej:

Um heer en nou te gaon oétrope tot neeje Prîns,
waobeej weej eum beneume tot:
Ridder in de Ordes ván d'n Dreumel, de Moelbaer en de Aendekoel,

Met de iëretitels:

Grande Capitano del Piroscafo; Hoëfdofficier ván Jong Nederland;
Veurgenger ván Proemgas; Lord Furniture; Ambassadeur ván ‘t Roëje Kögelke wies ‘t Blauwe Stertje; 
en oétvinger ván de orde ván de “Kameräöj ván de Scheive Taoffel”
en rope nou oét tot ver-en-vieftigste Prîns ván 't Dreumelriêk:

Prîns Ted d’n Iërste
mit zien Prinses Marian en Adjudante Rob en Leon

Gegaeve, Hôrs 9 Jannewari 2016

Bekiëk de foto's ván de proclamatie heer