Lucie en Han

Vastenaovend 2022 27, 28 februari en 1 maart

"Ván en brulluf keumpt en brulluf. Vur d’n onêch of ’t êch ôs liefde is oprêch"

 

4. Han en Lucie

 

Naam:  Lucie Geurts - Saris & Han Geurts

Leeftijd: 48 jaar & 49 jaar 

Woonplaats: Horst

Liefde ontstaan op : Niet in één zin te omschrijven, lees ons verhaal hieronder

 

 

 

 

 

 

Hoe IS JULLIE LIEFDE ONTSTAAN? 

Weej, Han Geurts (49) en Lucie Geurts - Saris (48) oêt Hôrs, ziën aal miër as 30 jaor same. D’n voonk tusse ôs sloog ni aover mit carnaval ma Han waas waal verkliëd en d’r woord ok same gezonge. Sinterklasliedjes, welteverstaon.

4. Han & Lucie

Wie we beej mekaar waore, besloot Han um ma nimmer mei op weentersport te gaon, ma vort carnaval te viere. We waore daan ok veul in de Mêrthal te vinge, sloge genne carnavalsdaag aover.

Iëne carnaval waas vur os hiël biezoonder. Eind ’93 vroog ’t Roeie Kruus aan os af weej as borebroedspaar vur d’n onech wojje trouwe. Natuurlijk zagte weej “jao”.

’t Woord enne hiële moeie carnaval. We zaoge Preens Baer I oetkome, ginge nà de proonkzitting, deje mei aan d’n optoch en nag veul miër.


Daags vur os boorebrulluf waor ut valentijnsdaag, we haaje zelfs valentijnkaarte in de bus. Op carnavals deensdag waas ’t zoor en biëstig kald. Durrum woord d’r beslaote um neet op ut bordes vaan ut gemeentehoês ma in de Mêrthal te trouwe. De ierste kiër dat dit gebeurde. Dao waas ’t waerm en gezellig en mocht ik, Lucie, zinge vur en volle Mêrthal. Vur Han zong ik, vanoet de groond vaan mien haart: “Geej ziet ’t moeiste waat ik heb” vaan Dorothé Cox. ’T carnavalslied waat weej nag steeds ’t állerschonste vinge.

Miëst bizoondere vaan daen daag was ’t end vaan ’t fiëst in de Mêrthal. We waore aal vaan de bühne àf, de TL’s waore aan en d’n heftruuk kwaom al binne um op te ruume. Weej mochte toen, vaan hoëg op d’n heftruuk,  in en groete houte veilingkist nag efkes nà aalle Dreumels en Dreumelinnekes zwaaie. Ni lichtig zulle we vergaete hoe toen hoonderde Dreumels tegeliëk “You never walk alone” zonge.

’s Aoves hajje we mit de ganse bubs vaan ’t Roeie Kruus nag en afterparty. Dao vroog ik, Han, af Lucie ok in ’t ech mit meej woj trouwe. Natuurlijk zâg zeej “jao”.

Op ozze vreejgezellendaag en joar latter, d’n echte, ginge we mit aalle kammeui aete beej de Alde Lind. We mochte bestelle waat we ma wojje en woordte romantisch beejiën aan en teffelke mit en kaerske gezatte. Wiej iederiën ur hoefdgerêch kreeg, moste weej efkes wachte. En dao kwaom Liesbeth, mit enne lach vaan oër wies oër mit ôs hoëfdgerêch: Booremos mit wôrs! Weej keke gek op, ma hebbe d’r hiël romatisch, biëstig va genaote. Mit de carnaval eate eej nag altied Booremos mit wôrs.

Thumbnail_trouwfoto 1995Ok ôs echte brulluf waas en moei fiëst. Ok toen kloonk “You never walk alone”. D’r waore 8 elders gruts: 4 echte elders en 4 onechte (bore) elders.

In aal die jaore ziën we mit veul plezeer carnaval bliëve viere. Ieder jaor denke we daan wir efkes terug aan carnaval ’94. Zeker op carnavals deensdag as d’r wer en ander verliefd paartje oppe bûhne stiët. Juus dor dao aan te denke, dor steeds same te bliëve fiëste blief ’t leuk. Hiëlemaol moei is ’t um te zeen daat ok os kiender ’t carnavalsviere zò schon vinge. Wao de jongste speuld roondum de Mêrthal, stiët nummer twieje as jeugdraodslid oppe bühne en zingt de aldste echt ieder carnavalslied mei.

Weej kunne daan ok iederiën áraoje um carnaval te viere. Ge wet ma noeit mit wie geej daan inens stot te zinge of te dânse. Ge het lichtig ennen aovend lol en misschien sliët d’r waal enne bliëvende voonk aover. Ma kiek oët op de borebrulluf want… vaan en brulluf kuumt en brulluf.

Weej kunne in ieder gevâl noeit miër “You never walk alone” hüre, zoonder in gedachte wir efkes in de Mêrthal te staon en kiepevael te kriëge vaan de herinnering aan aal die zingende Dreumels.