Lambert I

Proclamatie Lambert I

Proclamatie 1992-1993,
Prins Lambert I (Lambert Joosten)

WEEJ, VÓRS PAUL;

mit of zoonder oow goodvinge, viefde vórs vaan 't Dreumelriëk, ridder in de ordes vaan d'n Dreumel, de Moelbaer en de Endekoel, Freiherr von Unterricht, Iëredrager vaan d'n Alde Knoeper, enz. enz.

Ovverwaegende:

• Ten ierste: daat iederen Dreumel de komende daag opgetrómmeld zal waere um áf te marchere noa 't joarliks joeksfestival.
• Ten twedde: daat heej um in de moat te kunne kome, d'r twië vurâf zal kriëge.
• Ten derde: daat weej doamei dees daag neet thoës, ma mit de meziek mei zie.
• Ten virde: daat de vastenoavend moot liëke op enne grandioze wedstrijd, spannend vanaf d'n âftrap wies 't leste signaal.
• Ten viefde: daat zonne wedstrijd neet zoonder publiek gespeuld kaan waere; doamei neet gezâg is, daat de beste speulers nevve de lien stoa.
• Ten zesde: daat weej de driedaagse pianissimo zulle beginne, ma daat d'n optocht aal fortissimo zal trekke.
• Ten zuvvende: daat weej 't op moandaag mit waat minder amesure zulle doon; andante non troppo, ma oos op deensdaag te bárste zulle bloaze wies de moat vól is, zoëdaat we op aswoensdaag de piëp oët hebbe en neet mit en opgebloaze geveul bliëve zitte.
• Ten achtste: daat geej de komende daag niemus vaan de toënladder moogt laote valle of iemus ovver de notenbálk moogt goëije.
• Ten niggende: daat weej 't doabeej op en accoordje zulle goëije, ma daat daat nag gen flötje vaan enne cênt is.
• Ten tiende: daat weej door zulle goa wies d'n tap toe is, ma daat geej oos doanoa de liër op kunt.
• Ten elfde (en ten leste): daat weej beneejd zie waat vur vleis weej in de kuüp hebbe, neet de pezerik oët wille hange of oos aas broadwórste wille gedrage, woamei bes waal gezâg is daat 't grös en bitje miër moog zie, ma daat 't neet al daag vesseldaag is.

Besloete:

Um heer en nouw te goan beneume toet iën-en-dartigste PREENS VAAN 't DREUMELRIëK, mit de iëretitels va Ridder in de Ordes vaan D'n Dreumel, de Moelbaer en de Endekoel, Premier d'Abattoir de Carbonade, Freiherr von Schenk wies Pekel, Grand Cornet do Piston, Graaf vaan Taptoe wies Last Post en oëtvinger vaan de Hoësorde vaan de Stiënstroat.
En rope nouw oët toet PREENS VAAN 't DREUMELRIEK:

LAMBERT DN IERSTE

Gegaeve in Hórs, 30 jannewari 1993.
Vórs Paul