Neejs

Proclamatie

Weej, Vôrs Naggus, Achste Vôrs ván ‘t Dreumelriêk; Ridder in de ordes ván D’n Dreumel, de Moelbaer en de Aendekoel; Grande Mago con Mestolo; Tower of Power; Grand Donateur des Chansons, Ambassadeur ván de Horsternachte, enz, enz, hebbe de groëte iër um heer en nów, met of soonder ów goodvinge, d’n zuvven-en-vieftigste Prîns ván ‘t Dreumelriêk te proklamere en te installere;  Ovverwaegende:

Ten Iërste: Dát, now weej de miëste veurnemens vur 2019 al wer hebbe loate vare, ‘t tiêd wuürdt dát weej ós gaon opmake vur en neej wervelend vastelaovesjaor.

Ten Twedde: Dát weej ok dit jaor wer enne fantastiche kandidaat hebbe gevónge deen ós ás zuvven-en-vieftigste Dreumelprîns door d’n vastenaovend zal navigere.

Ten derde: Dát weej met deze Prîns de nagel op de kop hebbe gehouwd en weej d’r dán ok soonder miër ván ovvertuugd ziên dát heej de drie-daagse vastenaovesklus hendig zal kunne klaore. 

Ten Verde: Dát D’n Dreumel ok dit joar wer aerg zien best haet gedaon um de vastenaovend good óp te zetten, zoedát ‘t vur os neeij trio en kwestie ván intikke is.

Ten Viefde: Dát enne Prîns natuurlijk ut gooije veurbiëld mót gaeve án de Dreumels en Dreumelinnekes, már dát dát ni wil zegge dát heej aalt ‘t reachte paad mót bewândele.

Ten Zesde: Dát weej d’r ván ovvertuugd ziên dát weej met deze Prîns iërstesklas materiaal in hoês hebbe geháld dát án alle eigenschappe voldeut die weej ván enne gooije’n Dreumelprîns moge verwâchte.

Ten Zuvvende: Dát ózze neeje Prîns d’r good vur zal zörge dát d’r deze vastenaovend nörges enne keenk in de kabel keumt en dát d’r beej de minst of geringste weerstand direct umgeschakeld wuürdt zoedát álles door kán bliêve stroëme.

Ten Achste: Dát dit joar de “service” en groëte rol speult en dát weej dán ok alle Dreumels en Dreumelinnekes de gooije road gaeve um ‘t neeje trio veurop te loate loepe zoëdát de gânse Zwick kán volge.

Ten Niggende: Dát ózze neeje Prîns tiedes de vastenaovend hiël zeker gen lang hemd á zal hebbe en ok niks óp de lange baan zal schuûve, már wál hiël zeker enne lange’n oijem zal hebben en oeteindelijk dán ok án ‘t langste end zal trekke.

Ten Tiende: Dát, in á-loëp naor zien heerschappij, de neeje Prîns en groët gediëlte ván de Horster buurte haet bewoënd veurdát heej oeteindelijk, met de vastenaovend vur de deur, in zien ambtswoëning is neergestreke. 

Ten Elfde en leste: Dát ós neej trio ás vánzelluf zien oêterste best zal doon um de Merthal drie daag lang stâmpvaol te kriege, umdát ze zich now iënmaol ontiegelijk thoês veule in zónne mierenhoëp.

Besloête weej:  Um heer en nou te gaon oétrope tot neeje Prîns, waobeej weej eum beneume tot: Ridder in de Ordes ván d'n Dreumel, de Moelbaer en de Aendekoel, Met de iëretitels:  Commandeur ván de Multimaeter, Baron vom Marmeladendorf bis Österreich, 

Captain Road Hog, Princeps Formicis, Hertog ván de HOVOC, en oétvinger ván de orde ván “de Zèkdäömpels” en rope nou oét tot zuvven-en-vieftigste Prîns ván 't Dreumelriêk: 

Prîns Lars d’n Iërste
mit zien Prinses Cindy en Adjudânte Dennis en René  Gegaeve, Hôrs 26 Jannewari 2019

Proclamatie 2019 

Bron: Omroep Reindonk