Jan II
Prîns Jan II Jan Keijsers
Names ’t ganse Dreumelvolk, vanoavend, zondag 11 fibberwarie 1968 um 20 oor 11 beejien,
wille weej: +Momus+
mit ow goodvinge Vorst ovver ’t Dreumelriek van ’t gedempte Rotven toet ’t opgeknapt Endekuulke, en va de nate te Hessele toet de kalde grond va d’n Hei-österik, ovverwaegend:
Ovverwaegende:
- Ten Iërste: dat de carnaval zonder prins krek zoveul waerd is as ennen tummerman zonder doemstok;
- Ten Twedde: dat de vorst vur zien regering enne prins nuedig haet, din in leef en liëd zienen doënste noabere kan zien;
- Ten Derde: dat zonne prins d’r enne mot zien, di noeit de plank mis sliet, umdat-ie gin plank vur de kop haet;
- Ten Verde: dat-ie altied de nagel op de kop wet te sloan, genne afgezagden is, en zeker genne höltere;
- Ten Viefde: (en ten leste) dat ie in stoat mot zien, zich beej de viering va carnaval an ’t bestek te halde, de vörming va splinterparteeje taege te goan, en minstens 3 daag hoks te blieve:
Besloete:
um heer en now te proclamere toet prins van os Dreumelriek:
Jan de twedde,
Um vur ten hoëgste iën joar te regere ovver ’t volk va de Horster Dreumels en Dreumelinnekes, onder veurwaarde, dat geej doamej akkoard got, want no zien meining hove we nimmer te vroage.
Da gaeve weej ‘m van waege zien stamboem beej deze de titels:
Meister va de Scheive Sluëp en de Botte Nieptang, Lord Waterpas, Leste Graaf va Vurenholt toet Palisander, Erfgenaam va de Viefdoemse Nagel, Jonkhiër Multiplex, Beschermhiër va de Pliesterlat en de
Geliemde kegelbal, en beneumen ‘m ok nog plechtig toet:
Ridder in de orde va de Schitspool, va de Groete Moelbeer en va ’t Endekuulke , en verliënen ‘m daobeej de Orde va de Keduke Weefstool.
Gegaeve in de hoëfstad va os Riek
Carnavalsvereniging D’n Dreumel Horst
