Neejs
Preens Geert d'n 3e
19 januari 2020
Weej, Vôrs Naggus, Achste Vôrs ván ‘t Dreumelriêk; Ridder in de ordes ván D’n Dreumel, de Moelbaer en de Aendekoel; Grande Mago con Mestolo; Tower of Power; Grand Donateur des Chansons, Ambassadeur ván de Horsternachte, enz, enz, hebbe de groëte iër um heer en nów, met of soonder ów goodvinge, d’n âcht-en-vieftigste Prîns ván ‘t Dreumelriêk te proklamere en te installere; Ovverwaegende:
Ten Iërste: Dát weej oow kunne melde dát wej d’r dit jaor alwer vur d’n âcht-en-vieftigste kiër i zien geslaagd um enne kandidaat te vinge deen án alle kwalificaties voldeut um d’r enne kleurriêke vastenaovend ván te make.
Ten Twedde: Dát weej ok dit jaor de lat wer biëstig hoëg hebbe gelâg en de lange latte wer op groëte huügte zulle waere gebraocht.
Ten Derde: Dؘát geej echt neet per sé óp de Venraoysewaeg mót woëne um Dreumelprîns te waere, már dát ’t wál de bedoeling is dát de Prîns duudelijk richting guft án de vastenaovend.
Ten Verde: Dát weej met deze Prîns enne’n echte’n creatieve daenker kriêge, din aoveraal wál en oplossing vur haet zoëdát oeteindelijk toch aalt álles good keumt en heej zich daorum ok neet hárd lut jage of betoepe.
Ten Viefde: Dát ózze neeje Prîns d’r hoëgstpersoenlijk vur garant stiët dát d’n accu ván alle Dreumels en Dreumelinnekes ópgelaaje blieft zoëdát ze mit de vastenaovend ok állemaol mobiel blieve.
Ten Zesde: Dát weej best kunne zegge dát ózze neeje Prîns zien wilde haor inmiddels en bitje kwiêt is, wát neet wil zegge dát heej zien streke haet verliërd of oëits gâns zal verliëre.
Ten Zuvvende: Dát weej d’r ván ovvertuugd ziên dát deze neeije Prîns zich pielsnel, doelgericht en trefzeker wiët á te pâsse án zien neeje take ás prîns ván 20-20.
Ten Achste: Dát weej enne’n ontiegelijk hulpvaardige Prîns kriêge waor nag krek ni óp ziene veurkop stiët geschreve dát heej de Dreumels en Dreumelinnekes drie daag lang beej de hând wil neme en de waeg wil wiêze.
Ten Niggende: Dát weej mit deze Prîns de vastenaovend ál vur ’t graötste diël in de groôndvaerf hebbe staon zoëdát weej d’r lak á kunne hebbe ás d’r heej of daor nag wát á geschoord mót waere.
Ten Tiende: Dát weej bliej ziên dát ózze neeje Prîns en groët familiemeens is en dát weej dán ok hiël zeker wiete dát weej mit deze’n ideale schonzoën dit veurjaor neet ván enne kalde kermis thoês zulle gaon kome.
Ten Elfde en leste: Dát en hiël recaent oonderzeuk haet oêtgeweze dát 71% ván de Dreumels en Dreumelinnekes vingt dát carnaval in augustus eigelijk best wál kán.
Besloête weej: Um heer en nou te gaon oétrope tot neeje Prîns, waobeej weej eum beneume tot: Ridder in de Ordes ván d'n Dreumel, de Moelbaer en de Aendekoel, Met de iëretitels: Groëthertog ván de Beurs, Freiherr von Farbe bis Pinsel, Baron ván 71%,
Principe Estivo di Duemilaotto, Captain One Hundred and Eighty, en oétvinger ván de orde ván “De Beurs wies InterChalet” en rope nou oêt tot âcht-en-vieftigste Prîns ván 't Dreumelriêk:
Prîns Geert d’n Derde
mit zien Prinses Eveline en Adjudânte Johan en Theo
Gegaeve, Hôrs 18 jannewari 2020