Neejs

Vastenaovend 2023

Preens Patrick d'n 1e

21 januari 2017

Weej, Vôrs Naggus:Achste Vôrs ván ‘t Dreumelriêk;Ridder in de ordes ván D’n Dreumel, de Moelbaer en de Aendekoel;Grande Mago con Mestolo; Tower of Power;Grand Donateur des Chansons, Ambassadeur ván de Horsternachte, enz, enz,hebbe de groëte iër um heer en nów, met of soonder ów goodvinge,d’n viêf-en-vieftigste Prîns ván ‘t Dreumelriêkte proklamere en te installere;Ovverwaegende:

Ten Iërste: Dát dit 5x11 jubileumjaor vrugt um enne waardige prîns din d’r ontiegelijk nao oêtzuut um ‘t komende jaor mit hulp ván zien prinses, adjudânte, Raod ván Elluf en Vôrs de scepter te zwaaije ovver ’t Dreumelriêk.

Ten twedde: Dát ózze neeje prîns en echt aovendmeens is di bisoonder veul móijte schient te hebbe mit óp tiêd kome, már dát daor teggenaover stiët dát heej ok aalt ás letste de taent verlut.

Ten Derde: Dát dit digitale tiêdpaerk veul vrugt ván de neeje prîns en weej daorum bliej zien dát weej enne sportieve alleskunner hebbe gevónge di d’n accu alves vur ut ganse seizoen haet opgelaaje.

Ten Verde: Dát ózze neeje prîns nag noëits enne Hôrster carnaval haet gemist, jaorelang haet gehôlpe beej de opbouw ván de proclamatieact en zellufs nao de carnaval in Rio is gewest um zich veur te bereide vur zien á-komend ambt ás jubileumprîns. 

Ten Viefde: Dát weej dit jaor te make kriêge mit enne duurzame prîns din niks te make wil hebbe mit dieselschandale, már din daorum ok nag aalt óp zeuk is naor draodloze stroëm.

Ten Zesde: Dát ’t good is um te wiëte dát deze prîns zienne pasta beej ’t Hart ván Horst zeker neet te gaar gekokt wil, wat op zich hiel logisch is umdát heej wál ván enne’n byte hult.

Ten Zuvvende: Dát weej enne prîns kriege din ’t voetbal nag krek ni zelluf haet oêtgevónge, már din hiel zeker gezeen móg waere ás iën van de groëte Helden ván‘t Hôrster voetbal, zoëwál boête óp ’t vaeld ás binne in de zaal. 

Ten Achste: Dát ’t belangriek is dát enne prîns ondernemend is en veul kontakte haet, en weej daorum ok in de wôlke ziên mit deze jubileumprîns, din ván netwaerke zien beroep haet gemákt en sinds kort ok nag es enne’n echte Brugge-bouwer is.

Ten Niggende: Dát ’t ni bekend is of ózze neeje prîns enne poetsfiemel haet of neet, már dát ut algemein bekend is dát heej ontiegelikke juks kriegt van en bekend maerk poetsmiddel.

Ten Tiende: Dát ózze jubileumprîns dá wál genne Spiderman, Hulk of Batman is, már dát heej toch zeker gezeen mót waere ás d’n Hôrster Tarzan.

Ten Ellefde en leste: Dát beej peunt iën, ás âftrapper van dees proclamatie, ozze ceremoniemeister nag neet genumt woord, már dát juust heej hiël zeker gebroederlijk dit jubileumjaor i zal gaon.

Besloête weej:
Um heer en mit Veul Plezeer nou te gaon oétrope tot neeje Prîns,waobeej weej eum beneume tot:Ridder in de Ordes ván d'n Dreumel, de Moelbaer en de Aendekoel,Met de iëretitels:Groët Ambassadeur ván Wittenhorst; Marquis Beaucoup de Plaisir; Captain Kaafrot; 

Grande Ammiratore del Calcio in Fori Luci; Vaeldmaarschalk ván de Stuksbeemd; Ambassadeur ván Bit wies Byte; en oétvinger ván de orde ván “Ut ván Helden Vaeld”en rope nou oét tot viêf-en-vieftigste Prîns ván 't Dreumelriêk:

Patrick d'n 1e

Prîns Patrick d’n Iërste mit zien Prînses Jane en Adjudante Marcel en Hans
Gegaeve, Hôrs 21 Jannewari 2017